Recomendación do club de lectura

 Catro alumnas do Grupo 1 do Club de Lectura que remataron de ler o libro de Alicia Borrás Sanjurjo "Nata y Chocolate" veñen á radio para recomendalo a toda la comuidad educativa.

                             

Rematamos libro!

 O pasado venres tivemos unha nova reunión no Club de Lectura, neste caso co Grupo 1. Nesta xuntanza demos por rematada a lectura do libro que estabamos a ler, "Nata y Chocolate" de Alicia Borrás Sanjurjo. É una novela cortiña, fácil de ler e que lle gusta toda a rapazada. Aborda temas como o bullying, a amizade e a superación. Moi recomendable.

Tamén se decidiu cal será a próxima lectura, por unanimidade escolleuse "Escarlatina, a cociñeira defunta" de Ledicia Costas.

Tamén tivemos unha xuntanza do Club de Lectura co Grupo 2. Estamos a ler "Nata y Chocolate" de Alicia Borrás Sanjurjo e, ao igual que ocurre co outro grupo de rapazada que xa leu esta novela, está gustando moito. Trátase dunha novela que aborda o bullying, a amizade e a importancia de ter seguridade nun mesmo. Unha lectura amena, entretida e que aborda valores moi importantes.

Aínda que non había que rematar o libro, houbo compañeiras que xa o leron todo.

Club de lectura de adultos

 O pasado martes 20 de febreiro houbo unha xuntanza do Club de Lectura de Adultos para facer a escolla da próxima lectura. Houbo varias propostas moi interesantes, pero a maioría dos membros do Club decantouse pola novela de Óscas Reboiras Loureiro, "A agonía das folerpas" en galego, ou o mesmo libro titulado "El caso Salgueiro" en castelán.

                                

Entrevistando á Intelixencia Artificial

 Hoxe, 13 de febreiro, celebramos o DÍA MUNDIAL DA RADIO co alumnado de 3º de primaria que se converteu nun auténtico equipo radiofónico para participar na convocatoria de PONTE...NAS ONDAS!

Nesta ocasión, o noso programa de radio escolar abriu os micrófonos para unha entrevista moi particular; a convidada é Ursa, unha intelixencia artificial coa que o alumnado puido conversar, facer preguntas e reflexionar sobre a importancia da IA no doso día a día.

Para que serve a IA? Como funciona? Será Ursa quen de facernos os deberes ou axudaranos a aprender? Ursa pode ter emocións?

A experiencia foi moi enriquecederoa, xa que combinou  o traballo da expresión oral e a escoita activa co uso das novas tecnoloxías e a maxia da radio, un medio que segue a ser unha poderosa ferramenta de comunicación, educación e a participación.

Na Ruxi Radio seguimos aprendendo, preguntando e facendo RADIO!

           

As nenas somos de ciencias!

 Hoxe celebramos a curiosidade, o talento e a valentía de todas as mulleres e nenas que exploran, investigan e transforman o mundo a través da ciencia. Ao longo da historia, moitas científicas contribuíron de maneira decisiva ao progreso da humanidade, aínda que non sempre recibiron o recoñecemento que merecían.

Este día lémbranos a importancia de crear referentes, romper estereotipos e fomentar vocacións científicas dende idades temperás. A ciencia precisa de todas as miradas, de todas as ideas e de todas as voces.

Animemos ás nenas a preguntar, experimentar e soñar sen límites. 

                                                      

Escarlatina no Ruxi Club

 Na primeira xuntanza do Ruxi Club co grupo 2 despois das vacacións de Nadal estivemos a falar e debatir sobre a lectura que a rapazada rematau de ler durante o periodo vacacional, "Escarlatina, a cociñeira defunta" de Ledicia Costas.

                                             

Resultou ser unha lectura moi divertida e amena na que se presentan varias receitas de cociña que teñen moi boa pinta.

Despois de comentar o libro damos por rematada a lectura e quedamos para a próxima xuntanza no comedor e así poder elaborar e logo degustar algunha das receitas que aparecen no libro.

Club de lectura, grupo 1: Nata y chocolate

  O pasado venres tivemos unha nova xuntanza do Ruxi Club co Grupo 1, nesta ocasión estivemos a comentar como vai a lectura do novo libro que están a ler, "Nata y Chocolate" de Alicia Borrás Sanjurjo.

Está resultando ser unha lectura moi interesante, que trata un tema moi presente nas aulas necesario abordar e falar sobre el, o acoso escolar, como detectalo e saber que medidas adoptar... unha lectura que nos fai reflexionar e que ata o de agora está gustando moito.

Acordamos rematar o libro para a próxima xuntanza.

Receitas riquísimas no Ruxi Club

 O venres tivemos unha nova xuntanza co Ruxi Club, Grupo 2.

Nesta ocasión a reunión non foi na biblioteca, como é habitual, foi no comedor, onde, cos ingredientes que tiñamos, elaboramos algunhas das receitas que aparecen no libro de Ledicia Costas que acabamos de rematar, "Escarlatina, a cociñeira defunta".

Resultou ser unha xuntanza moi divertida na que compartimos opinións sobre o libro e, sobre todo, degustamos as receitas elaboradas. Unha experiencia para repetir.

1,2,3... ENTROIDO!

 Co Petardazo en Xinzo de Limia comezamos a troula, chega o ENTROIDO, unha das nosas festas galegas favoritas. 

Queredes saber que é o entroido? Premede no vídeo para coñecer datos interesantes desta festa tan divertida.

ANDROLLA, CHARRÚA, FILLOAS, MECO, PANTALLA... Imos aprender estas e outras palabras relacionadas coa festa con este completo DICIONARIO ENTROIDEIRO.

Nesta festa non pode faltar unha boa CHARANGA para por a música nos desfiles, na festa, nas rúas... 

Queredes unha CHARANGA Á CARTA? Premede na imaxe e poderedes crear a vosa charanga con música entroideira.

Aí vos deixamos unha presentación para ser expertos no Entroido: actividades, xogos, cantigas, recomendacións lectoras...

A ARTE QUE FALA

 Creando Mensaxes de Paz e Crítica Social

Para conmemorar  o Día da Paz, puxemos en marcha un proxecto colectivo onde o noso alumnado demostra que a arte é unha poderosa ferramenta de crítica social e pacifismo, explorando  varias liñas de traballo:

Simboloxía Urbana: Analizamos a linguaxe de artistas como Banksy, Obey e Jocapi, centrándonos no contraste entre a violencia e a natureza (flores e pombas fronte a obxectos bélicos).

                                   

Mafalda e os Dereitos Humanos: Inspirándonos no humor crítico de Quino, traballamos a conciencia social dando voz aos nosos cativos.    

Banksy: O seu símbolo máis icónico é o Love is in the Air (Flower Thrower). Substitúe un cóctel Molotov por un ramo de flores, transformando un xesto de violencia nun acto de esperanza. Alumnos/as de 5º e 6º EP.

OBEY: "As flores son as nosas armas." Deseñando con cores potentes e  formas xeométricas definidas e unha mensaxe visual directa a prol da paz:"Sementa flores, non bombas." 

Ademais, o alumnado de 3º participou nunha actividade diferente na que  deseñaron e crearon chapas e gravaron mensaxes de paz, compartindo palabras de respecto, amizade e solidaridade. Un pequeno xesto cheo de significado para construír un mundo mellor.

Ler e xogar no Ruxi Club

 Despois das vacacións de Nadal retomamos as xuntanzas do Ruxi Club, nesta ocasión co Grupo 1 que remataron o libro que estaban a ler "Altas Aspiraciones" de Charlie Feedwood. 

Comentamos, debatimos e tivemos tempo para a xogar ao Pasapalabra do libro.

Tamén houbo tempo para escoller a próxima lectura, algo que costou bastante xa que había moi boas opcións.

A seguinte lectura será "Nata y Chocolate" da autora Alicia Borrás Sanjurjo.

FRAGA DA DIVERSIDADE

 

As ÁRBORES DA PAZ medran no noso cole

Hai persoas que plantan sementes… e hai persoas que plantan esperanza.
Unha delas foi Wangari Maathai.

Wangari naceu en Kenia e aprendeu desde pequena que as árbores falan, aínda que non teñan voz. Contan historias de auga limpa, de animais, de sombra e de vida. Por iso decidiu plantar árbores para coidar a Terra e tamén ás persoas.

Ela dicía que cando plantamos unha árbore, estamos a plantar paz. Para Wangari Maathai, as árbores eran moito máis ca plantas: eran unha ferramenta para mellorar a calidade de vida das persoas e fomentar a paz. Polo seu compromiso co medio ambiente e coa xustiza social, recibiu o Premio Nobel da Paz no ano 2004. (primeira muller africana en recibilo).

E así comezou un gran movemento no que miles de mulleres en precaria situación económica uniron as súas mans para encher o mundo de verde.

O alumnado de 2º conta a historia de Wangari a través do conto "Wangari e as árbores da Paz". Ademais gravaron unha canción tradicional africana para acompañar.

No noso colexio tamén queremos escoitar ás árbores. Coa creación da Fraga da Diversidade, cada árbore representa un valor: o respecto, a amizade, a igualdade, a convivencia e o amor pola natureza.

Cada vez que regamos, coidamos e observamos a nosa fraga, lembramos que o futuro medra pouco a pouco… igual ca unha árbore, promovendo  valores como o respecto pola natureza, a convivencia, a igualdade e a responsabilidade ambiental.

Este proxecto axúdanos a comprender que o coidado do medio ambiente é unha tarefa compartida e que, a través de accións sinxelas como plantar unha árbore, podemos contribuír a un mundo mellor.

Recomendacións Día da Paz

Na biblioteca preparamos esta recompilación de recursos para traballar o Día da Paz nas aulas e en familia: xogos, curtas, cancións, lecturas... Esperamos que vos gusten!

 

Última xuntanza dos clubs de lectura

 Chegamos ao final do trimestre e tivemos a derradeira xuntanza do 2025. Seguimos coa lectura da novela de Charlie Feelwood, "Altas Aspiraciones". Está gustando moito, aproveitaremos para rematala durante as vacacións de Nadal.

Como co grupo anterior, tivemos a derradeira xuntanza do 2025 co Grupo 2. Nesta ocasión demos por rematada a novela que estabamos a ler, ¿Quién quiere ser e novio de mi hermana? de Maite Carranza.

Xogamos ao Pasapalabra do libro e escollemos a próxima lectura, "Escarlatina, a cociñeira defunta" de Ledicia Costas.

O último día de clase antes de comezar as vacacións de Nadal, os dous grupos do Ruxi Club xuntáronse na biblioteca para recibir un pequeniño agasallo. Foi unha reunión breve, chea de bos desexos para o próximo ano, de propósitos de descanso, disfrutar das festas e da familia e de rodearse de moitas lecturas.