ÚLTIMA REUNIÓN DO RUXICLUB NO 2023

 Todo preparado para dar comezo a última reunión do Ruxi Club do 2023:                             

                     

 

O pasado venres celebramos a última reunión do Ruxi Club deste 2023. Tocaba sesión co Grupo 2, pero como era un día especial, a mestra encargada do Club quixo dar un pequeno agasallo a todo o alumnado que participa no Club de Lectura, así que reunímonos na biblioteca os dous Grupos para recibir un pequeno doce.

                      

 Logo de desexarnos Boas Festas e felicitarnos o Ano Novo, os integrantes do Grupo 1 marcharon e quedamos reunidos o Grupo 2 tal e como estaba previsto.

A reunión deu para moito, rematamos de comentar o libro que estábamos a ler "Plan de rescate" de Antía Yáñez. A rapazada comentou que se trata dun libro divertido, de intriga e que lles gustou bastante.

Como xa vai sendo habitual, ao rematar de intercambiar impresións sobre o libro, a coordinadora do Club preparaulles un Pasapalabra sobre o mesmo. Pásamolo pipa! Acertaron todas as preguntas!

 

                    

 Unha vez rematado o Pasapalabra tocou escoller a nova lectura... A decisión estivo moi axustada...

 

                    

 

E a próxima lectura será...

 

                              

                       O Equipo da Biblioteca deséxavos

                         Boas Festas e Boas Lecturas!!!

 

Volver a casa por Nadal!

 Remata o trimestre, chega o Nadal que nos trae moito tempo para compartir cos nosos seres queridos. 

@S Axudantes da biblioteca xa comezaron a decorala con esta árbore de contos.

Tempo para xogar, divertirnos, para as xuntanzas pero, sobre todo, tempo para CANTAR E LER!

Velaí tedes unhas recomendacións de panxoliñas de Nadal

         

E para rematar o trimestre deixamos unhas suxestións de lecturas para desfrutar este Nadal.

SOPA DE EUROPA CO GRUPO 1

 O pasado venres tivemos unha nova xuntanza co Grupo 1 do Ruxi Club. A rapazada escollera "Sopa de Europa" do autor Rafael Ordóñez para comezar as lecturas deste curso.

Durante a reunión tivemos tempo de falar do libro, de comentar se nos gustara ou non, se o recomendamos a outros compañeiros/as, falamos dos países que saen no libro, o que máis nos gustou, curiosidades sobre gastronomía, arte...

Logo de intercambiar impresións sobre a lectura, a mestra responsable do Club propúxolles as rapazas xogar ao Pasapalabra sobre o libro. Pasámolo moi ben coas respostas, botamos unhas risas e divertímonos moito.

Noa Gil, unha alumna participante do Ruxi Club, non so leu o libro, tamén fixo un marabilloso traballo sobre o mesmo. Noa amosounos o resultado do seu esforzo, buscou e investigou, redactou e ilustrou sobre cada un dos países que aparecen en cada capítulo do libro.

Fantástico Noa, estamos moi orgullosas de ti!

Próxima lectura...

Club de lectura: grupo 2

 O pasado venres 24 de novembro tivemos unha xuntanza no Club de Lectura co grupo 2. O alumnado deste grupo escollera "Plan de Rescate" de Antía Yáñez para comezar as lecturas deste curso.

A rapazada estivo moi participativa, houbo debates, críticas, preguntas, recomendacións sobre este libro, gustos e preferencias sobre determinados personaxes...

Queda moi pouquiño para rematalo, de momento, sen facer espoiler, está gustando moito.        

                            

Día da discapacidade

 

TODO O BO COMEZA SEN BARREIRAS!

A Convención sobre os Dereitos das Persoas con Discapacidade, aprobada en 2006 e asinada por 180 países di:

"A accesibilidade e a inclusión das persoas con discapacidade son dereitos fundamentais"

E pide que as persoas con discapacidade podan levar unha vida independente e participar de forma activa no desenvolvemento da sociedade.

Solicita aos Estados que tomen as medidas apropiadas para darlles pleno acceso ña actividade cotiá e eliminar todos os obstáculos á súa integración.

#DiaInternacionalDasPersoasConDiscapacidade

No Ruxidoiro, lembramos a personaxes famosos e históricos que chegaron moi lonxe a pesar da súa discapacidade e a pesar de todas as barreiras que atoparon no camiño. 

Son un exemplo de superación que nos amosan cada día que o esforzo e a constancia teñen a súa recompensa. Persoas que non ven un problema  na súa discapacidade senón unha oportunidade de avanzar e superarse a si mesmas.

 

                    #TodooBoComezaSenBarreiras

Deixamos nesta presentación os nosos traballos e unhas recomendacións lectoras.

Aceptamos suxestións para ampliar os títulos da biblioteca!

 

dia da discapacidade de Marta Alvarez 

Isto é rock!

Seguindo o noso proxecto RuxiARTe, no que estamos a traballar sobre as súas diferentes disciplinas, este luns visitounos  Javier Becerra, periodista e escritor de diferentes títulos relacionados coa música.

Coa súa axuda o alumnado de sexto foi facendo un percorrido do ROCK desde os anos 50 ata a actualidade.

O alumnado disfrutou de boa música e de moitas anécdotas relacionadas con moitos grupos e artistas.

 

#ACABOUSE

Contra a violencia machista o alumnado do Ruxidoiro di   #acabouse

Na biblioteca temos as nosas lentes violetas porque cremos nun mundo sen violencia, nun mundo onde os homes e as mulleres, as nenas e os nenos sexan tratados co mesmo respecto.

 

En infantil, miramos o mundo con lentes violetas

O alumnado de 6º gravou na radio un manifesto contra a violencia de xénero, logo dunha reflexión nas aulas das distintas violencias, os estereotipos., micromachismos... Premede na imaxe para escoitar o seu manifesto.

O alumnado do 1º ciclo reflexionamos sobre o consentimento a través dos contos.

Como saudamos aos adultos?

Temos a obriga de bicar ou dar apertas se non queremos? 

 As nenas e os nenos temos dereito a decidir a quen bicar e cando bicar. Os adultos temos a responsabilidade de escoitar e respectar as súas decisións.

As nenas e os nenos de 2º gravamos na radio o noso manifesto. 

"Nin un biquiño á forza"

Premede na imaxe para escoitar o seu manifesto.

 Ademais fixemos a nosa versión do mesmo conto. Velaí vos deixamos o resultado.

Traballamos nas aulas sobre os estereotipos, contra todas as violencias, a importancia do consentimento e berramos #acabouse

          

 

DÍA UNIVERSAL DOS DEREITOS DA INFANCIA

                                               

O 2O  de novembro celébrase o Día Internacional dos Dereitos do Nen@, tamén coñecido como o Día Universal da Infancia. 

É unha data que nos fai lembrar que os adultos somos os primeiros e únicos responsables de cumprir e facer cumprir que todos os nenos e nenas, sen ningún tipo de distinción nin discriminación, teñan todos os seus dereitos: ser educado, coidado e protexido, que ten dereito a divertirse, a aprender e a expresarse e que ademais, todos os nenos e nenas teñen o dereito de ir á escola, a recibir coidados médicos e a alimentarse para garantir o seu desenvolvemento en tódolos aspectos.

Na biblioteca tedes á vosa disposición unha exposición con contos e libros relacionados coa temática.

Na biblioteca podedes atopar moitas lecturas interesantes sobre os vosos dereitos e historias que nos contan como son as vidas de nenos e nenas noutros países. 

Aí vos deixamos algunhas recomendacións!

       

  Lembramos os dereitos da infancia?

 Para coñecer máis e comprobar o que sabes sobre os teus dereitos aquí vos deixamos un TRIVIAL.

MIRAMOS CON LENTES VIOLETAS

 Ao longo deste curso, comezando coa conmemoración do Día contra as violencias machistas, o equipo de convivencia propón unha serie de actividades para mirar o mundo que nos rodea con LENTES VIOLETAS.

Reflexións nas aulas sobre os estereotipos, os micromachismos; analizamos letras das cancións que escoitamos, as series que vemos, os "influencers" que seguimos e os libros que lemos e temos nas aulas. 

Na biblioteca tedes unha urna para deixar as vosas reflexións. Animamos ás familias a participar!

Desde a biblioteca facemos as seguintes recomendacións lectoras, xogos e cortos que iremos ampliando coas vosas aportacións. Esperamos as vosas suxestións!

 

MES DA CIENCIA

 Iniciamos curso con novos proxectos na biblioteca: 

O CLUB DE CIENCIAS

Neste mes de novembro: 

 

Nas aulas e na biblioteca imos facendo os nosos experimentos. 

En 5º de educación infantil chegou unha misteriosa carta do profesor Aguado. Nela, propoñía un reto para o alumnado.

Con tres utensilios: coador, embude e esponxa,

Seredes quen de trasvasar a auga dun recipiente ao outro? 

Pensando e probando... adiviñaron como facelo!

 

 

     

O alumnado de 2º aproveitou o Samaín para facer o experimento "O globo máxico"