Recomendacións lectoras

Acaba o curso e agora... que?

Toca descansar e cargar pilas e... LER, ler moito.

As vacacións con lecturas saben mellor!

 

Tempo de despedidas

  Un ano máis despedimos aos axudantes de biblioteca que nos acompañaran ao longo de todo o curso adicando tempo de lecer a colaborar nas tarefas bibliotecarias. 

Grazas a todos e todas!

Sorte nesta nova etapa que comezades!

Despedida do Ruxi Club!

 Hoxe, logo de varios intentos fallidos por mor das moitas actividades programadas para este remate de curso, conseguimos reunirnos os dous grupos do Club de Lectura.

Foi unha xuntanza especial, rematamos de ler o libro de Miguel López, "El Hematocrítico", "Dona Problemas", unha lectura divertida, orixinal e moi rápida. Comentamos o libro que, en xeral, gustou moito, houbo quen se sentiu identificado/a coa protagonista, recordamos as visitas, no curso pasado, de "El Hematocrítico" e despedímonos, por este curso, do Club de Lectura.

Como estamos xa preto do verán e o alumnado que participa no Club de Lectura marcha do cole, a coordinadora quixo agasallar a cada participante cun diploma pola súa constancia, interese e participación ao longo do curso e para que se leven un bo sabor de boca, XEADOS para o Ruxi Club!

Un rapas transquilo

O equipo de convivencia e benestar emocional en colaboración cos equipos de biblioteca e dinamización da lingua galega convidou a ÉRIC DOPAZO  a unha presentación na nosa biblioteca. Escritor, mestre, músico e autor do libro Eduardo Blanco Amor. Blanco amor puido ser un escritor calquera pero non o foi; atreveuse a ser el mesmo nunha época na que pouca xente o facía. 

Na era das redes sociais, da intelixencia artificial, reivindicamos un mundo diverso cheo de todas as cores e, por suposto,  SER NÓS MESMOS!

O respecto aos demais comeza por entender que cada un, cada unha ou cada unhe somos diferentes. Abrazar a diversidade é perder o medo ao que non coñecemos, derrubar muros e falsas crenzas e posicionarnos sempre cos DEREITOS HUMANOS. Escoitamos e reflexionamos con Éric despois dun curso enteiro de pensar o bo trato e os coidados e de querer tecer redes de amizade entre nós...

# Emociónate#Iguálate#Convive.

 

Avó, avoa cóntame un conto!

Un ano máis, os avós e as avoas achegáronse ás aulas a contar os contos favoritos dos netos e das netas. A experiencia resultou moi enriquecedora para a rapazada. Deixamos unha pequena mostra dos momentos compartidos.

 

"Dona Problemas", nova lectura do Ruxi Club

 Comezamos nova lectura, será a última do Ruxi Club deste curso que xa está a piques de rematar.

Como unha pequena homenaxe ao gran autor (e persoa) Miguel López, "El Hematocrítico", falecido o pasado mes de novembro, que nos fixo varias visitas durante o curso pasado, o alumnado e a coordinadora do Club de Lectura decidimos ler o libro "Dona Problemas".

Miguel deixou un gran legado tanto en literatura infantil, como xuvenil e para adultos, moitas das súas obras están na nosa biblioteca. Ademais era unha persoa moi creativa, inxeniosa, intelixente, con gran sentido do humor e sobre todo, moi boa xente. Que gran perda!

Hoxe a rapazada do Ruxi Club comeza a ler "Dona Problemas", seguro que algún sorriso se nos escapa coa lectura.

Letras galegas 2024

 O 17 de maio, Día das Letras Galegas, está adicado a 

LUISA VILLALTA

escritora, filóloga e violinista galega.

Premede nas ligazóns a distintas actividades sobre a vida e obra desta autora galega.

O PORTAL DA LINGUA GALEGA

PRIMAVERA DAS LETRAS

CANTO SABES DE LUISA VILLALTA?

XOGOS E QUEBRACABEZAS

Algunhas recomendacións lectoras.

O alumnado de 5ºB realizou un faladoiro para homenaxear a LUÍSA VILLALTA, a  poeta a cal a RAG adica este ano as Letras Galegas.

Con este podcast a nosa escola participa no VI CONCURSO DE PODCAST-RADIO NA BIBLIO. Premede na imaxe para escoitalo.

Escola de familias

 Na biblioteca do centro estreamos a Escola de Familias no centro en colaboración co CFR de Ourense. Un espazo onde aprender, compartir experiencias e debater sobre a educación dos nosos fillos e das nosas fillas. Agardámosvos!

Encontros coa autora

 

Iria Misa, é licenciada en Filoloxía Inglesa e profesora de ensino secundario. Como autora de literatura infantil e xuvenil deuse a coñecer coa novela "Xa non estou aquí" que obtivo o Premio Jules Verne de literatura Xuvenil no 2016. no ano 2018 publica as novelas "Segredos no solpor" e "Mamá, quero ser Ziggy Stardust" que conseguiu o Premio Fervenzas Literarias ao mellor Libro Infantil nese mesmo ano. outra das súas obras, "A cidade do átomo" publicada en 2021 gaña o IV Premio Agustín Fernández Paz de Narrativa Infantil e Xuvenil. En 2023 publica "Unha veciña de película".

 A autora,Iria Misa, visitou a nosa biblioteca e conversou co alumnado de 5º e 6º sobre as obras que leron tanto nas aulas como no club de lectura.

O alumnado de 6º, Laura, Álvaro, Silvia e Ruth, gravou unha entrevista con esta autora na Ruxiradio.

Iria, grazas pola túa visita, implicación e amabilidade!

O Club de lectura recibe agasallos!

 O alumnado de ambos grupos do Club de Lectura decidiu que a próxima lectura sexa "Unha veciña de película" da autora Íria Misa. Como está programada unha visita desta autora ao noso colexio, o Club de Lectura agasalla cun exemplar deste libro a cada participante do club, pola súa participación ao longo do curso, a súa constancia, implicación e interés.

Parabéns rapaces e rapazas!!!

Non esquezades os vosos libros para que Íria volos asine!!!

Gañador@s dos microrrelatos

                                      Atención! Atención!

Xa temos gañadores e gañadoras do 

Concurso de Microrrelatos sobre a 

non discriminación por razón de xénero.

Noraboa a Rafael, Álvaro, Carolina e Beatriz!

Grazas a todos e todas as participantes!

DÍA DO LIBRO

 

APADRIÑAMENTOS LECTORES

Un ano máis, o alumnado de infantil, 1 e 2º de primaria

terá unha sesión de contacontos a cargo dos maiores do cole.

Podemos contar os contos de mil maneiras: recitando, lendo, versionando, contos musicados, interpretando... 

Como o 22 de abril é o Día da Terra recomendamos que as lecturas compartidas sexan relacionados co coidado do noso planeta.

AMIGO INVISIBLE DE LIBROS

O profesorado participa tamén intercambio libros a través do amig@ invisible. Os libros serán unha sorpresa.

Que lectura tocará?

DÍA DA TERRA

 

Visitade a exposición adicada ao noso planeta. 

Terra, feliz día!

Esperámosvos na biblioteca!

Día do libro infantil e xuvenil

 

Dende 1967 o Día Internacional do Libro Infantil e Xuvenil celébrase o 2 de abril, coincidindo co nacemento do escritor danés Hans Christian Andersen, autor de contos como ‘La Sirenita’, ‘El patito feo’ ou ‘El soldadito de plomo’. O obxectivo é espertar o interese e o amor polos libros e a lectura para a infancia e a mocidade e convertelo nun hábito da vida.

A lectura pode axudarnos a potenciar a imaxinación, a empatía, a creatividade e a linguaxe, esencial nas primeras etapas do desenvolvemento.

 Dende a biblioteca do noso cole, propomos as seguintes actividades para celebrar este día:

- Lectura en familia: cando lemos con eles compartimos tempo de calidade que axuda a reforzar o noso vínculo.

- Recomendación do noso libro favorito.

- Visitar a biblioteca do cole ou da túa zona.

- Compartir libros coas túas amizades.

- Contar un conto aos teus maiores: papá, mamá, avó, avoa...

Pensades nalgunha outra actividade para celebrar este día?

Sabíades que o 2 de abril tamén se celebra o Día do Mundial de Concienciación do Autismo?

O trastorno do espectro do autismo (TEA) é unha condición que afecta á forma de pensar e comportarse, á comunicación e á interacción cos demais. 

As nosas recomendacións lectoras van encamiñadas á concienciación e coñecemento destes trastorno. 

Aplicación móbil con contos interactivos.

... E moitos máis!

Contacontos con Xana

 

O 22 de marzo visitou o noso centro unha cadeliña de Intervención asistida acompañada de Nuria.

Visitaron as aulas de Educación Infantil e, ademais, contaron un conto ao alumnado de 2º de Educación Primaria.

"Por catro esquiniñas de nada", Jérome Ruillier. Un conto de apariencia moi simple pero que agocha unha gran lección. Un conto sobre a amizade, a diferenza e a inclusión. 

Velaí tedes un vídeo dos mellores momentos desta visita. Premede na imaxe: