Detective Ferruchi

 Esta semana houbo unha xuntanza do Club de Lectura para adultos, nesta ocasión tivemos unha visita moi especial para nós, visitounos Marta Villar, autora da novela que lemos no Club, "Detective Ferruchi" e coa que gañou o Premio Novela Xerais 2024.

Resultou unha xuntanza inesquecible, falamos da novela, por suposto, das personaxes, das diversas temáticas que se abordan ao longo da lectura, temáticas que se traballan no colexio. Falamos de como Marta trata temas durísimos dun xeito sinxelo, con tenrura e moita sensibilidade, ás veces ata cómico.

Tamén Marta nos explicou o proceso de creación da novela, o que quería transmitir con ela, o vocabulario empregado...

"Detective Ferruchi" é unha novela moi recomendable, divertida, emotiva, fácil de ler, con personaxes cos que nos podemos identificar... Dende o Club de Lectura recomendámola, de seguro que vos gustará.

Logo de comentar e falar de "Detective Ferruchi" xogamos ao Pasapalabra da novela, pasámolo moi ben!

A tarde deu para moito e moi bo, todas quedamos encantadas, emocionadas e agradecidísimas pola visita de Marta Villar que é un encanto de muller, moi próxima e natural.

Como mostra de agradecemento a Marta, quixemos agasallala cun pequeno detalle, agardando que se sentise tan ben como nos sentimos nós con ela.

MOITÍSIMAS GRAZAS MARTA!

SEMPRE SERÁS BENVIDA NO NOSO COLEXIO E NA NOSA BIBLIOTECA!